Sefaj: Largimi im ka prapavijë politike të stilit ballkanik

Ish-ministri i Punëve të Brendshme, Flamur Sefaj, ka thënë se përpos largimit të tij, institucionet është dashur të merren më shumë edhe me menaxhimin e situatës së krijuar pas dëbimit të gjashtë turqve nga Kosova. Ai ka pranuar se nuk kanë arritur ta menaxhojnë situatën.

“Në vend që të kërkohet largimi, në këtë rast imi, është dashur të formohet një task-forcë, e cila do ta menaxhonte situatën: për atë se a duhet dikush të shkojë në Turqi, t’i kërkojë ata njerëz, të kërkohet nga Erdogani se si trajtohen ata, po ashtu t’u shpjegohet Shteteve të Bashkuara të Amerikës dhe BE-së”, ka thënë ai në emisionin Zona B, përcjell albinfo.ch.

Sefaj edhe një here ka thënë se i vjen keq për arsyet e largimit nga ky post. “Nuk e konsideroj se arsyeja bazohet në ato kritere, por lojërat politike janë të tilla, janë mjaft ballkanike. ‘Bizantine’ ndoshta është term më i sofistikuar, por ‘ballkanike’ mendoj se është terminologjia e saktë”, tha ai.

Ish-ministri i Punëve të Brendshme ka thënë se kur ka dorëzuar dorëheqjen, nuk ka kërkuar që AKR-ja të vazhdojë të mbesë pjesë e qeverisë. Sefaj ka deklaruar se largimi nga posti i ministrit të Punëve të Brendshme dhe ndarja me bashkëpunëtorët ka qenë akt shumë i vështirë. Ish-ministri ka pranuar se ai nuk i ka informuar presidentin dhe kryeministrin lidhur me veprimet për deportimin e gjashtë shtetasve turq, pasi thotë se atë është dashur ta bëjë AKI-ja.