Rushiti: Talat Xhaferi s’ka lënë shenjë si kryeministër

Analisti politik në Maqedoninë e Veriut, Fatos Rushiti, ka folur për kryeministrin e parë shqiptar atje, Talat Xhaferin, i cili udhëhoqi qeverinë teknike, përcjell albinfo.ch.

Rushiti tha se Xhaferi nuk ishte në krye të detyrës, pasi sipas tij, ai ishte tërësisht nën hijen e ministrit Artan Grubi, i cili po ashtu vjen nga BDI-ja.

“Por tani kur kaluan tre muaj nga e gjithë kjo garniturë, kjo shfaqje e një kryeministri si Talat Xhaferi, nuk mendoj se ka qenë në detyrën e duhur, pasi tërësisht ishte nën hijen e Artan Grubit, një ministër nga BDI-ja. Talat Xhaferi, duke qenë edhe në listën e deputetëve nga radhët e BDI-së, absolutisht ishte nën hijen e Grubit”, tha Rushiti në “Edicioni Special”.

Më tej, ai tha se Xhaferi s’i përmbushi pritshmëritë dhe, sipas tij, nuk ka lënë shenjë si kryeministër, teksa përmendi edhe vizitën e Xhaferit në një nga institucionet maqedonase.

“Talat Xhaferi ishe jashtë çdo parashikimi në një vizitë që e bëri në një institucion, ku në një takim me zyrtarë në një sportel administrativ, i bërtiste një njeriu në rolin e policit, pra ishte një skandal”, tha ai.