Rasti i Berishës

Etrit Berisha mund të luajë ndaj Cagliarit nëse konfirmohet lëndimi i portierit të Atalantas, Marco Sportielo

Për portierin e Kombëtares shqiptare, Etrit Berishën duket se po afrohet ora e debutimit me Atalantan. Portieri shqiptar ka shumë gjasa të jetë titullar në ndeshjen ndaj Cagliarit në Serie A, shkruan albinfo.ch.

Sipas mediave italiane, portieri i parë i Atalantas, Marco Sportielo, vuan nga një dëmtim në shpinë dhe është në pikëpyetje për takimin e së dielës. Vendimi përfundimtar do të merret gjatë stërvitjes së fundit me porta të mbyllura para nisjes me aeroplan drejt Sardenjës. Nëse 24-vjeçari nuk ia del, atëherë vendin e tij do ta zë Berisha.

Kështu, e vetmja mënyrë që portieri i Kombëtares shqiptare të gjejë hapësira janë dëmtimet ose pezullimet e Sportielos. Kjo pasi trajneri Gian Piero Gasperini tashmë e ka bërë të qartë se italiani është zgjedhja e tij e parë për portën, duke e lënë Berishën në situatë të ngjashme sikurse te Lazio.

Kjo ishte edhe arsyeja që Etriti u largua nga Lazio. Sigurisht se kjo do të ndikojë edhe në Kombëtaren shqiptare, pasi ai gjithmonë ka qenë i pazëvendësueshëm.