Raportohet se një raketë ruse është rrëzuar me armën amerikane “Stinger”

(KEYSTONE/EPA/SERGEY KOZLOV)

Një reporter i mediumit ukrainas, “Kyiv Independent”, ka thënë se trupat ukrainase kanë rrëzuar një raketë ruse duke e përdorur armën amerikane, “FIM-92 Stinger”.

Gazetari Illia Ponomarenko tha se kjo ka ndodhur në rajonin e Luhanskut dhe se ngjarja është e konfirmuar.

“Trupat ukrainase në rajonin Luhansk kanë arritur të pengojnë një raketë Tochka-U…me një FIM-92 Stinger. Kjo është e konfirmuar. Nëse nesër ata e fundosin luftanijen Admirali Kuznetsov (të Rusisë) me një (armë kundërajrore) NLAW, absolutisht nuk do të befasohem”, shkroi Ponomarenko në profilin e tij në Twitter.

Shtetet e Bashkuara, Britania e Madhe dhe disa vende të tjera perëndimore e kanë furnizuar Ukrainën me armë, përfshirë armët anti-tank.