Qytetet zvicerane, ndër më të shtrenjtat në nivel global

Cyrihu, Gjeneva, Bazel dhe Berna në mesin e top qyteteve me kosto të lartë

Nuk duhet të jetë befasi për askënd që katër qytetet kryesore të Zvicrës – Cyrihu, Gjeneva, Bazel dhe Berna – u renditën në vendin e dytë, të tretë, të katërt dhe të pestë, respektivisht, në Renditjen e Qyteteve të Kostos së Jetesës 2022, të publikuar nga shërbimet financiare Mercer, njofton albinfo.ch.

Vetëm Hong-Kongu është më i shtrenjtë.

“Mercer llogarit koston e jetesës dhe strehimit për mërgimtarët bazuar në sondazhet e veta të çmimeve që korrespondojnë me zakonet e tyre të shpenzimeve, të cilat mund të jenë të ndryshme nga ato të popullsisë vendase. Dhe firma nuk përfshin kostot e arsimit dhe shëndetësisë, në përgjithësi që përballohen nga punëdhënësit e familjeve të emigrantëve”, tha kompania.

Këto gjetje janë në përputhje me një tjetër sondazh, të publikuar më 14 qershor, i cili gjithashtu renditi Cyrihun dhe Gjenevën ndër më të shtrenjtat për banorët ndërkombëtarë.

Në mënyrë paradoksale, të dy qytetet u renditën gjithashtu në Top 10 “qytetet më të jetueshme”, në një indeks të vlerësimit të kushteve të jetesës në 172 qytete.

---