Qeveria kërkon ndriçimin për vdekjen e dy qytetarëve serbë në Obiliq

Ilustrim

Qeveria e Kosovës ka reaguar në lidhje me vdekjen e dy qytetarëve mbrëmë në Babimoc të Obiliqit.

Nëpërmjet një komunikate për medie, Qeveria e Republikës së Kosovës shprehet e shqetësuar me informatat për vdekjen në rrethana të pasqaruara të dy qytetarëve në Babimoc të Obiliqit, përcjell albinfo.ch.

“Qeveria kërkon nga organet e rendit që të ndriçohet ky rast sa më shpejtë që të jetë e mundur. Po ashtu, Qeveria e Kosovës fton të gjithë qytetarët që mund të kenë informata për rastin të bashkëpunojnë me organet e rendit”, thuhet në reagimin e Qeverisë së Kosovës.

Policia e Kosovës ka bërë të ditur se mbrëmë në fshatin në Babimovc të Obiliqit në një shtëpi janë gjetur të vdekur dy persona të nacionalitetit serb.

“Ekipi mjekësor në vendin e ngjarjes ka konstatuar vdekjen e viktimave, ndërsa njësitet policore janë në vend ngjarje duke u marrë me rastin”, kanë thënë zyrtarë nga Policia kosovare.