Policia e Sheriatit “kujdestaron” rrugëve të Gjermanisë

Deri më tash kjo “polici” ishte kufizuar vetëm në tërheqjen e vërejtjes dhe në dialogun për t`i kthyer “në rrugën e drejtë” të rinjtë myslimanë

Në qytetin Wuppertal të Gjermanisë janë paraqitur një numër të rinjsh myslimanë ekstremë të cilët patrullojnë natën rrugëve të qytetit dhe prezantohen si “polici e sheriatit” (Shariah Police). “Detyra” që ata ia kanë vënë vetes është të mbikëqyrin sjelljet e të rinjve myslimanë me qëllimin për të mos i lejuar, sipas tyre, të sillen aty ku ka degjenerim. Vendet ku këta persona, të cilësuar si pjesëtarë të grupeve salafiste kryejnë punën e tyre, janë pranë diskotekave, ku pihet alkool, ku ushtrohet prostitucion etj.

Ata, siç shihet në disa fotografi dhe xhirime që qarkullojnë në internet mbajnë uniforma ngjyrë portokalli ku në shpinë u shkruan “Shariah Police”.

Pas një periudhe tolerance, policia e Wuppertalit ka filluar të marrë masat ndaj kësaj dukurie. Ajo ka denoncuar 11 prej bartësve të asaj duke i akuzuar për shkelje të ligjit për tubim dhe ua ka marrë të dhënat personale, shkruan dpa. Policia thekson se askush përveç shtetit nuk ka të drejtë të mbikëqyrjes dhe kontrollimit të qytetarëve, prandaj veprimi i “Policisë së Sheriatit” është i kundërligjshëm.

Deri më tash kjo “polici” ishte kufizuar vetëm në tërheqjen e vërejtjes dhe në dialogun për t`i kthyer “në rrugën e drejtë” të rinjtë që i ka hasur në vendet e përmendura. Kjo paraqitje ka shkaktuar shqetësim në mesin e qytetarëve të Wuppertalit e më gjerë.