Ministria e Punëve të Jashtme dhe Diasporës dhe Instituti i Krimeve të Kryera Gjatë Luftës në Kosovë kanë nënshkruar një memorandum mirëkuptimi për forcimin e bashkëpunimit dhe prezantimin ndërkombëtar të dokumentimit të krimeve të luftës, përcjell albinfo.ch.
Memorandumi u nënshkrua nga zëvendëskryeministri i parë dhe ministri i Punëve të Jashtme dhe Diasporës, Glauk Konjufca, dhe drejtori ekzekutiv i Institutit, Atdhe Hetemi.
Sipas njoftimit të MPJD-së, dy institucionet do të bashkërendojnë angazhimet për prezantimin ndërkombëtar të hulumtimeve, dëshmive dhe publikimeve mbi krimet e kryera gjatë luftës në Kosovë.
Rrjeti diplomatik dhe konsullor i Kosovës do të mbështesë prezantimin e këtyre materialeve jashtë vendit, organizimin e aktiviteteve përkujtimore dhe zgjerimin e bashkëpunimit me institucione ndërkombëtare.
Ministria e ka cilësuar këtë bashkëpunim si një hap në forcimin e diplomacisë publike dhe në kundërshtimin e përpjekjeve për mohimin dhe relativizimin e krimeve të kryera nga Serbia ndaj popullit të Kosovës gjatë luftës.
MPJD-ja ka theksuar se synon njohjen sa më të gjerë ndërkombëtare të së vërtetës për luftën dhe krimet e kryera në Kosovë, në mbrojtje të drejtësisë dhe dinjitetit të viktimave./Albinfo.ch
Mbretëria e Bashkuar dhe Bashkimi Evropian kanë përfunduar negociatat për një paketë të re marrëveshjesh, duke shënuar një hap drejt forcimit të marrëdhënieve dhjetë vjet pas referendumit për Brexit-in, përcjell albinfo.ch.
Marrëveshjet u njoftuan më 20 nëntor, në samitin e zhvilluar në Bruksel ndërmjet kryeministrit britanik, Andy Burnham, dhe drejtuesve të institucioneve evropiane.
Sipas qeverisë britanike, paketa synon lehtësimin e tregtisë së produkteve ushqimore dhe bujqësore, lidhjen e tregjeve të emetimeve të karbonit dhe krijimin e mundësive të reja për të rinjtë.
Skema e re do të jetë e hapur për qytetarët britanikë dhe të BE-së të moshës 18 deri në 31 vjeç. Ajo parashikon deri në 100 mijë pjesëmarrës nga secila palë, me mundësi qëndrimi deri në tre vjet për punë, studime apo udhëtim.
Programi do të funksionojë përmes vizave dhe nuk përbën rikthim të lëvizjes së lirë. Pjesëmarrësit nuk do të përfitojnë automatikisht të drejtën për ndihma sociale dhe nuk do të mund të marrin familjarë në ngarkim përmes kësaj skeme.
Megjithatë, mundësitë e reja nuk hyjnë menjëherë në zbatim. Në deklaratën e përbashkët, palët synojnë zbatimin e marrëveshjes deri në vitin 2028 dhe vënien në dispozicion të mundësive për të rinjtë jo më vonë se janari 2030.
Deklarata konfirmon gjithashtu pjesëmarrjen e Mbretërisë së Bashkuar në programin Erasmus+ gjatë vitit 2027./Albinfo.ch