Pezullohen gabimisht llogaritë e ambasadës serbe nga “Twitter”

(KEYSTONE/Christian Beutler)

Kompania Twitter tha për Radion Evropa e Lirë se llogaritë në Twitter të ambasadave serbe në Armeni, Iran, Indonezi, Nigeri, Zimbabve, Gana dhe Kuvajt, si dhe Konsullata e Përgjithshme në Çikago, u pezulluan gabimisht më 18 gusht.

“Duke përdorur teknologjinë dhe burimet njerëzore, ne heqim miliona llogari çdo javë për shkeljen e politikave të platformës sonë. Në këtë rast, gabimisht kemi ndërmarrë veprime përmbarimore në llogari të shumta dhe ato janë riaktivizuar”, tha një zëdhënës i Twitter më 23 gusht.

Ministria e Punëve të Jashtme e Serbisë ka njoftuar më 22 gusht se llogaritë e Twitter të këtyre ambasadave serbe janë pezulluar “pa asnjë shpjegim apo mesazh të mëparshëm që tregon për shkelje të mundshme të rregullave të komunikimit në atë rrjet social”.

Pak ditë më parë kompania Twitter pezulloi llogaritë e disa deputetëve dhe politikanëve të Partisë Përparimtare Serbe, e cila është në pushtet në Serbi, dhe të një zyrtari qeveritar./REL