Pesë net pa gjumë të Ujkanit

“Leja nga FIFA për mua erdhi në orën 15:30 të së hënës, ndërsa në 20:45 fillonte ndeshja. Kisha pesë net pa vënë gjumë në sy duke pritur përgjigjen”, shprehet Samir Ujkani

Kapiteni i Kosovës, Samir Ujkani ka përjetuar me shumë emocione këto ditë. Ai debutoi me Kosovën, duke barazuar me Finlandën, kurse lajmet e mira erdhën edhe nga skuadra e tij aktuale, Pisa, shkruan albinfo.ch.

Ai për uebfaqen “GianlucaDiMarzio.com”, ka rrëfyer këto ditë sesi kanë shkruar. “Deri para një jave as nuk i bënim dot lojtarët për të zbritur në fushë. Leja nga FIFA për mua erdhi në orën 15:30 të së hënës, ndërsa në 20:45 fillonte ndeshja. Kisha pesë net pa vënë gjumë në sy duke pritur përgjigjen. Më në fund ishte pozitive, dhe u lehtësova shumë”.

Pika e Kosovës ishte historike. “Vazhdojnë të më vijnë mesazhe pa pushim, qysh para ndeshjes. Në atdhe është një popull i tërë që e jeton këtë moment dhe jemi krenarë që u dhuruam këtë pikë historike. Është një ëndërr e bërë realitet, pasi para dhjetë vitesh qe e pamundur të imagjinohej se do të vinte një ditë kur do të luanim në kualifikueset e një Kampionati Botëror”, deklaroi Ujkani.

Madje, edhe trajneri i tij Genaro Gattuso i kishte shkruar. “Më shkroi para ndeshjes për të më pyetur për lejen. E dija që edhe ai ishte i interesuar të dinte si do të shkonte puna”.

Ai kishte folur me lojtarë që të vijnë të luajnë për Kosovën. “Kam folur me shumë prej tyre dhe u kam dhënë përshtypjet e mia. Kishte nga ata që thanë ‘jo!’, e të tjerë që pranuan të luajnë për Kosovën. Secili bën zgjedhjet e veta, por ne duam që të gjithë të vijnë të luajnë me ne”, thotë Ujkani.

Derisa ai ishte i grumbulluar te Kosova, skuadra e tij Pisa shpëtoi nga falimentimi. “Ishte çmenduri e vërtetë, por për fat kemi një grup të fortë që diti të rezistojë. Nuk ishte aspak i lehtë ai muaj pa Gattuson, u duk si një jetë e tërë. Por ne nuk e humbëm kurrë besimin”, rrëfen 28-vjeçari.