Përshkallëzohet protesta e opozitës në Shqipëri, protestuesit gjuajnë me shishe molotovi

Ka përshkallëzuar protesta e thirrur nga Partia Demokratike në Shqipëri. Protestuesit kanë hedhur shishe me molotov para ndërtesës së kryeministrisë menjëherë pasi ka përfunduar fjalimi i Sali Berishës.

Disa protestues po ashtu kanë hedhur gurë, tymuese dhe shishe me molotov drejt forcave të policisë që kanë krijuar një kordon para kryeministrisë. Ata edhe janë përplasur mr policinë. 

Protestuesit i janë afruar policisë pasi kanë rrezuar barrierat metalike para Kryeministrisë.

Sali Berisha ka kritikuar ndërkombëtarët gjatë fjalimit të tij, krahas kritikave të ashpra nfaj kryeministrit të Shqipërisë Edi Ramës.

“Na grabitën vulën e partisë, ndonëse dy palë zgjedhje, tre votëbesime ju kishit shprehur vullnetin tuaj. E ndaluan emrin e Sali Berishës në fletën e votimit. Na mohuan financat, na mohuan komisionerët në qendrat e votimit. Qeveria, mediat më të fuqishme, diplomatë dhe ambasadorë të korruptuar nga narkoqeveria u frynë qëllimisht zjarrit të përçarjes dhe konfliktit midis nesh. Dhe së fundmi, njësoj si në Rusinë e Putinit, lideri i opozitës u arrestua si person nën hetim dhe u tentua t’i ndalohej fjala e lirë. Të gjitha këto vetëm e vetëm se ai, në mbrojtje të interesit publik dhe kombëtar, denoncoi fuqishëm korrupsionin qeveritar dhe atë ndërkombëtar. Denoncoi korrupsionin e Edi Ramës dhe qeverisë së tij si armikun më të egër të qenies së qytetarëve shqiptarë. Të gjitha këto vetëm e vetëm pse ai mbrojti i palëkundur interesin e kombit shqiptar, denoncoi projektet antishqiptare, por edhe antieuropiane, serbo-ruse, të Aleksandër Vuçiçit, argatit të tij Edi Rama, të mbështetura fuqimisht nga Sergej Lavrov, por jo më pak edhe nga Aleksandër Soros. Dhe në fakt, për të gjitha këto sot, ne nuk duhej të ekzistonim politikisht.

Por ne fituam miq! E gjithë kjo luftë kundër nesh u bë që sot ne të ishim të përçarë, të ishim të shtrirë përtokë, që sot ne të mos ishim këtu. Që Shqipëria sot të mos kishte opozitë. Por ne realizuam të pamundurën, ne realizuam atë që nuk e parashikonte asnjë njeri. Asnjë opozitë në planet nuk do ekzistonte pas sulmeve barbare që u bënë ndaj ndesh. Siç nuk ekziston opozitë në Rusi,Bjellorusi, Iran apo Uganda ku janë marrë masa të të njëjta si këto kundër nesh.

Ndaj dhe ju vini sot në këtë shesh si heronj. Po, po. Si heronj të të vërtetës, heronj të guximit dhe dinjitetit njerëzor. heronj të pluralizmit, heronj të antikorrupsionit, heronj të atdhetarizmit. Ju vini si heronj të betejave të fituara.”