Përfundon konferenca e teknologjisë “KosICT”

Për dy ditë me radhë në Prishtinë është mbajtur konferenca më e madhe në Ballkan në fushën e teknologjisë “KosICT”, shkruan albinfo.ch.

Ky ishte edicioni i gjashtë i kësaj konference, që çdo vit po bëhet më i njohur, dhe në çdo edicion ka shumë befasi për të ftuarit e shumtë.

E veçanta e këtij viti ishte se është diskutuar nga më shumë se 30 folës, e tashmja dhe e ardhmja e teknologjisë me tema të tilla si: IoT, AR/VR, Blockchain, SaaS dhe FinTech.

Të pasionuarit pas teknologjisë kanë pasur rastin që për dy ditë me radhë, të takohen gjithashtu edhe me drejtues, investitorë dhe folës VIP nga e gjithë bota.

Derisa teknologjia çdo ditë e më shumë po përparon në botë dhe po i kushtohet më shumë rëndësi, organizatorët kanë sjellë nga afër disa prej kompanive më të mëdha të botës në kryeqytetin e Kosovës.

Gjatë viteve që është mbajtur kjo konferencë kanë marrë pjesë më shumë se 70 folës nga Google, LinkedIn, Apple, Revista Ndërmarrëse, Deutsche Telekom dhe më shumë se 2000 pjesëmarrës nga e gjithë bota.

Organizatorët e edicionit të fundit janë shprehur të kënaqur me rrjedhën e konferencës, ku kishte shumë folës, mysafirë specialë, personalitete, biznese dhe shumë adhurues të teknologjisë.