Për tre muaj, 90 infermierë kanë marrë licencën që iu mundëson punësimin jashtë Kosovës

(KEYSTONE/Gaetan Bally)

Kryetarja e Odës së Infermierëve të Kosovës (OIK), Nexhmije Gori, ka thënë se në tremujorin e parë të këtij viti janë lëshuar 90 licenca të paplastifikuara për infermierë, licenca këto që u shërbejnë atyre për punësim jashtë vendit.

Ajo vlerëson se ky numër do të vazhdojë të rritet pas liberalizmit të vizave, ku sipas saj, sistemi shëndetësor në Kosovë për një kohë shumë të afërt do të ballafaqohet me mungesë të infermierëve.

“Unë veç jam deklaruar, vitin e kaluar kam dhënë statistikat, po këtë vit ka jashtëzakonisht rritje. Në tremujorin e parë janë lëshuar deri në mes të marsit rreth 90 licenca të paplastifikim dhe rreth 18 vërtetime të kodit etik. Çka domethënë që për tremujorin e parë numri është dukshëm i rritshëm, çka unë pretendoj që numri do të jetë në rritje në vazhdimësi, ngase me liberalizimin e vizave tash infermieret, mamitë dhe profesionistët të tjerë shëndetësorë po kanë mundësi t’ i vizitojnë vendet e rajonit, të shohin kushtet e punës, natyrisht i kanë kontaktet me të lehta. Do të vërehet një zbrazësi edhe në vende të punës, një vit e tutje numri do të shihet saktë sa kanë emigruar në vendin e rajonit”, ka thënë ajo.

Gori shton se pagat të cilat marrin infermieret e kanë të pamundur të tejkalojnë muajin pas rritjes së çmimeve.

“Pagat të cilat infermierët i posedojnë janë e pamundur për të tejkaluar një muaj duke pasur parasysh zhvillimin dhe çmimet të cilat çdo ditë e më shumë janë në rritje. Kushtet e punës tash mundësia tjetër dhe standardet e jetës sigurisht në vendet e zhvilluara janë shumë më atraktive dhe ata përveç që po migrojnë vetë po kanë mundësi po u mundësohet që të tërheqin edhe fëmijët edhe familjet e tyre. Çdo njeri nga ne po dëshiron një standard më të mirë jetësore kushte më të lehta të punës pagë më të mirë këto janë gjitha arsyet cilat po i pretendojmë të gjithë”, ka thënë ajo.

Sipas saj, duhet të ndërmerren masa që largimi i tyre të ndalet, kjo dukuri mund të parandalohet me rritje page e ofrimin e kushteve më të mira të punës.

“Ajo çka unë pretendoj është rritja e pagës në rend të parë, sepse të gjithë ne jemi njerëz dhe të gjithë punojmë për një pagë dhe për një standard më të mirë jetësor. Pas kësaj edhe kushtet e punës kanë një rol të rëndësishëm ngarkesa në punë edhe infermierët, mamitë, edhe profesionistët e tjerë shëndetësorë duhet të inkuadrohen edhe në vendimmarrje kur ata kanë një udhëzim administrativ ose diçka që ata vendoset për të ardhmen ose profesionin e tyre që në këtë proces infermierët, mamitë dhe profesionistët shëndetësorë mos të them fare, po shumë pak marrin pjesë apo janë aktorë të këtyre vendimeve”, ka thënë Gori për Ekonomia Online.