Hyrja në Itali, me test negativ edhe për të vaksinuarit

Ndërsa personat e pavaksinuar duhet të qëndrojnë në karantinë për 5 ditë pas mbërritjes, përveç testit që duhet ta tregojnë.

Me rritjen e numrit të rasteve me variantin Omikron, Italia po ndryshon detyrimin e testit të koronës për udhëtarët nga BE dhe zona Shengen, pra edhe për ata nga Zvicra, transmeton albinfo.ch.

Më parë për hyrjen në Itali kërkohej vetëm e ashtuquajtura “pasaportë jeshile” (certifikata e vaksinimit), e cila lëshohej pas vaksinimit, shërimit ose pas një testi negativ.

Ndërsa duke filluar nga nesër (e enjte) deri më 31 janar u kërkohet edhe të vaksinuarve dhe të shëruarve një test PCR i vlefshëm për 48 orë, ose testi antigjen i vlefshëm për 24 orë, shkruan srf.ch.

Personat e pavaksinuar duhet të qëndrojnë në karantinë për 5 ditë pas mbërritjes, përveç testit që duhet ta tregojnë. Një përjashtim vlen për fëmijët nën moshën 12 vjeç, prindërit e të cilëve janë të vaksinuar. Ata pra nuk kanë nevojë të izolohen edhe nëse nuk janë vaksinuar.

Një tjetër përjashtim do të bëhet për udhëtarët ndërkufitarë në ditët në vijim. Për udhëtarët nga vendet jo-evropiane, rregullat që janë tashmë në fuqi vazhdojnë të zbatohen.

Po kështu vazhdon të kërkohet ende një formular i plotësuar dixhital i imigracionit.

---