Për herë të parë në vite, Danimarka nuk regjistron asnjë grabitje banke

pixabay

Transaksionet me para në dorë në vendin nordik pothuajse nuk ekzistojnë më. Danezët po përdorin kartat e kreditit dhe telefonat inteligjentë për të bërë pagesa.

Shoqata daneze e punonjësve të bankave mirëpriti lajmin të martën se gjatë vitit 2022 nuk kishte pasur asnjë grabitje banke.

“Finance Denmark”, shoqata e sektorit bankar, tha se vetëm rreth 20 filiale bankash në gjithë vendin kanë në gjendje para kesh. Por numri i degëve të bankave ka rënë nga 219 në vitin 1991, në 56 gjatë vitit 2021, tha në një deklaratë zëdhënësi Steen Lund Olsen.

Njoftimet mediatike vunë në dukje se në Danimarkë tërheqja e parave në banka ka rënë me rreth tre të katërtat çdo vit gjatë gjashtë vjetëve të fundit. Në vitin 2000 u regjistruan 221 grabitje bankash, tha shoqata “Finance Denmark” dhe në vitin 2021 pati vetëm një grabitje.

Keqbërësit e drejtuan vëmendjet te bankomatët, duke shënuar 18 grabitje në vitin 2016. Por edhe grabitjet e bankomatëve kanë rënë në zero mes shtimit të masave të sigurisë dhe atyre teknike, sipas shoqatës.

“Finance Denmark” thotë se vitet e fundit keqbërësit e kanë përqendruar vëmendjen tek mashtrimet në hapësirën kibernetike./Euronews