Penalltia më e çuditshme!

Gazeta spanjolle ‘Marca’ ka shkruar se penalltia e dytë ndaj Shqipërisë ishte më e çuditshmja e vitit

Dy penalltitë dhe dy kartonët e kuq të Shqipërisë ndaj Izraelit vazhdojnë të komentohen edhe nga mediat ndërkombëtare, shkruan albinfo.ch.

E përditshmja spanjolle “Marca”, në një postim në faqen zyrtare në internet, e ka cilësuar penalltinë e dytë si më të çuditshmen e vitit. Duke e shoqëruar bashkë me videon e situatës, media prestigjioze spanjolle shkruan:

“Ndeshja Shqipëri-Izrael përjetoi 4 minuta të rralla. Ndodhi gjithçka. Në minutën e 53-të, ndërkohë që rezultati ishte 0:1, sulmuesi izraelit Zahavi u rrëzua brenda zonës. Portieri shqiptar Berisha reagoi ndaj simulimit të tij që nuk u ndëshkua duke e goditur me kokë, çka shkaktoi karton të kuq dhe 11-metërsh.

Një humbje e qetësisë mendore që solli më pas heroizmin e Alban Hoxhës. Portieri u ngrit nga bankina dhe priti penalltinë e Zahavit. Në fund Shqipëria përfundoi duke humbur 0:3 me 2 lojtarë më pak. Çmenduri!”.

Edhe mediat italiane kanë shkruar për ndeshjen e Shqipërisë, duke kritikuar Berishën për veprimin e bërë, derisa paraqitja e Berat Gjimshitit la shumë për të dëshiruar.