Paqartësi rreth seancës së kuvendit për miratimin e demarkacionit

Me një orë vonesë ka nisur seanca e Kuvendit ku pritet të votohet për ratifikimin e demarkacionit më Malin e Zi. Kuvendi nisi me një minutë heshtje në nderim të të rënëve në epopenë e Likoshanit dhe Qirezit. Ndërsa deputetët votuan për shmangien e rregullores për demarkacionin.

Kundër ishte Vetëvendosje. Shefi i Grupit Parlamentar I kësaj partie, Glauk Konjufca përsëriti qëndrimin e Vetvendosjës se marrëveshja aktuale e demarkacionit me Malin e Zi duhet të tërhiqet nga Kuvendi për votim. “Lëvizja Vetëvendosje është kundër shmangies për procedurat e përshpejtuara pasi mendojmë se versioni i tillë i demarkacionit duhet të tërhiqet krejt. Komisioni Shtetëror ka ardhur te gjetjet problematike dhe ky raport 600 faqe ka sjell të dhëna kredibile se komisioni i Murat Mehës ka bërë shkelje serioze sa i përket procedurave teknike”, ka thënë Konjufca.

Më pas Kuvendi ka shkuar në pauzë e menjëherë është mbledhur Komisioni parlamentar për Punë të Jashtme, që zgjati vetëm 5 minuta. Vjosa Osmani, kryetare e Komisionit tha se pesë vota kanë qenë pro ndryshimit të Projektligjit nga 10 anëtarë, ndërsa 4 anëtarë të Vetëvendosjes dhe Zafir Berisha nga Nisma nuk kanë marr pjesë fare në votim. Për këtë Osmani tha se duhet të kërkojnë interpretim ligjor nga zyra ligjore e Kuvendit nëse ndryshimet miratohen vetëm me 5 vota. Por në fakt ishin 6 vota për. Në mbledhjen e tij të dytë, Komisioni ka siguruar votat e 7 deputetëve. Ndërsa ende nuk dihet se kur do të vazhdojë seanca e Kuvendit.

Kryeministri i Kosovës Ramush Haradinaj ka deklaruar se janë dakorduar rreth tekstit të Projektligjit dhe i njëjti të sillet në Kuvend dhe të votohet. I pyetur se a i kanë votat e mjaftueshme , Haradinaj tha se ende nuk e di sa vota mungojnë, por shtoi se kjo do të shihet gjatë seancës. Ai po ashtu tregoi se partia të cilën e drejton AAK-ja është unike. Haradinaj thotë se janë në diskutime edhe me deputetë të Listës Serbe por që ende nuk e di qëndrimin e tyre. Ndryshe nga Kryeministri, Ministri i Punëve të Jashtme, Behgjet Pacolli ka thënë se janë siguruar votat për ta votuar demarkacionin me Malin e Zi, derisa ka treguar se me deputetët e Vetëvendosjes biseduan për “kauzën” që qytetarët të udhëtojnë pa viza. Ai është shprehur I bindur se sot apo pak më vonë demarkacioni do të kalojë. Edhe Shefi i Grupit Parlamentar të LDK-së, Avdullah Hoti, ka ftuar deputetët e Lëvizjes Vetëvendosje që të votojnë demarkacionin me Malin e Zi.