Opozitarët protestuan në Gjilan

Partitë opozitare kanë protestuar të shtunën në Gjilan duke kundërshtuar marrëveshjen për Asociacionin e Komunave serbe dhe Demarkacionin me Malin e Zi.

Tri partitë opozitare në tubimin e tyre të mbajtur në Gjilan kundër Zajednicës e Demarkacionit fuqishëm i kanë kundërshtuar këto marrëveshje duke i vlerësuar si të dëmshme dhe të rrezikshme për Kosovën.

Fatmir Limaj, Ramush Haradinaj e Visar Ymeri, sic raporton Rajonipress në Gjilan thanë se nuk ka asnjë çmim që mund t`i ndalojë ata për të penguar Serbinë që të jetë hisedare në Kosovë.

Fatmir Limaj tha se Kosova e përgjumur po ngjallet dhe Kosova po bëhet më aktive.

“Kjo Kosova aktive po përkrahet nga qytetarët e të gjitha shtresave dhe mos lejoni që e ardhmja e juaj të vritet. Jemi kundër Serbisë në Kosovë” tha Limaj.

Edhe Ramush Haradinaj tha se Gjilani e Anamorava kanë ditur gjithmonë të jenë kundër marrëveshjeve të dëmshme për Kosovën..

Kurse Visar Ymeri tha se partitë në pushtet si zaptues të shtetit po e pengojnë qytetarin për të kundërshtuar këto marrëveshje.

Në këtë tubim të opozitës kanë folur edhe Ismajl Kurteshi, Rexhep Kadriu e Bajram Hasani. Protesta raportohet të ketë kaluar e qetë dhe pa incidente.