Odat Ekonomike në Kosovë e Serbi angazhohen për barazi në tregun rajonal

Gërxhaliu: “Si OEK kemi ngritur zërin që këto barriera t’i takojnë të kaluarës dhe ne vërtet kemi menduar që dialogu të jetë mekanizëm i kapërcimit të këtyre barrierave"

Oda Ekonomike e Kosovës ka prezantuar rezultatet e hulumtimit të realizuar nga “Forumi për Marrëdhënie Etnike“ dhe “Heinrich Böll Stiftung” për tejkalimin e barrierave për biznesin dhe normalizimin e marrëdhënieve mes Kosovës dhe Serbisë.  Kryetar i OEK-ut, Safet Gërxhaliu, deklaroi se janë duke bërë përpjekje të vazhdueshme në lehtësimin e të bërit biznes, tejkalimin e barrierave dhe eliminimin e ndikimit politik kur bëhet fjalë për zhvillim ekonomik.

“Si OEK kemi ngritur zërin që këto barriera t’i takojnë të kaluarës dhe ne vërtet kemi menduar që dialogu të jetë mekanizëm i kapërcimit të këtyre barrierave. OEK-u edhe më tutje do të ndjekë këtë përgjegjësi që të promovojë dhe të rrisë imazhin e vendit në mekanizmat rajonalë dhe ata ndërkombëtarë”, ka thënë Gërxhaliu.

Ndërsa kryetari i Odës Ekonomike dhe Industrisë të Serbisë, Marko Çadezh, ka thënë se është i rëndësishme fakti se dy vendet kanë filluar bashkëpunimin dhe që lidhjet ekzistojnë. Ambasadori britanik në Prishtinë, Ruairi O’Connell, të cilit iu nda mirënjohje, tha se dialogu në Bruksel është shumë i rëndësishëm, por sipas tij, dialogu duhet të vazhdojë nëpërmjet bizneseve si dhe për çdo nivel të shoqërisë. Ai shtoi se tashmë janë komitetet ato që japin kontributin kryesor në thyerjen e barrierave dhe krijimin e lidhjeve.