Një milion euro, fondi për viktimat e dhunës seksuale

Ministri i Financave, Bedri Hamza, ka thënë se nëse kjo shumë nuk mjafton, dikasteri të cilin e drejton është i gatshëm ta rrisë vlerën e këtyre mjeteve çdo fundvit

Një milion euro është fondi, të cilin Ministria e Financave e ka ndarë në buxhetin e vitit 2018 për kategorinë e viktimave të dhunës seksuale gjatë luftës në Kosovë. Ministri i Financave, Bedri Hamza, pas takimit që ka pasur me organizatat joqeveritare për rehabilitimin e viktimave seksuale, ka thënë se nëse kjo shumë nuk mjafton, dikasteri të cilin e drejton është i gatshëm ta rrisë vlerën e këtyre mjeteve çdo fundvit.

Ai ka mohuar që në Kuvend ka thënë se numri i kësaj kategorie po fryhet, sikurse ajo e veteranëve, duke shtuar se këtë numër e përcakton komisioni, i cili tashmë është duke e kryer punën në verifikimin e viktimave të dhunës.

Ndërkaq, Feride Rushiti ka thënë se ky kompensim nuk do të thotë se të mbijetuarat e dhunës seksuale do t’i harrojnë vuajtjet e përjetuara të torturës.