Në Prishtinë po mbahet “Java e Shkencës 2018”

Në konferencën kombëtare vjetore të shkencës “Java e Shkencës 2018”, ministri i Arsimit, Shkencës dhe Teknologjisë, Shyqiri Bytyqi, tha se kontributi shkencor po shënon rritje të vazhdueshme.

Ai tha se kjo javë paraqet një profilizim dhe mundëson potencialet ekzistuese dhe rigjeneron idetë e reja. “Ne kemi organizuar të gjithë këshillat shkencorë. Në të ardhmen do të vazhdohet në standarde ndërkombëtare, sistemi MASHT do të krijojë rrethana mbështetëse për shkencë, ngritjen e nivelit të financimit dhe ndërkombëtarizmit të saj”, ka thënë ai, përcjell albinfo.ch.

Ndërsa, presidenti Hashim Thaçi ka thënë se vendi ynë ka infrastrukturën arsimore më të mirën në rajon, por tha se duhet të punohet më shumë për përmirësimin e cilësisë “Mjafton të ecim me trende rajonale, duhet të lëvizim më shpejt, më mirë dhe në mënyrë më cilësore se të tjerët. Ekziston një lidhje mes rritjes ekonomike dhe rritjes së cilësisë në arsim, vetëm me këtë vizion mund të fuqizojmë rininë tonë të talentuar”, ka thënë presidenti. Gjatë kësaj konference do të pasqyrohen të arriturat e Kosovës dhe rajonit në fushën e shkencës për periudhën njëvjeçare, ndërsa qëllimi i organizmit të saj është shkëmbimi i përvojave të Kosovës me vendet e rajonit.