Në prag të festës së Pashkëve, Korça bëhet gati për fluks turistësh

Qyteti i Korçës është dekoruar në prag të festës së Pashkëve, ku qytetarët e kësaj ane, përveç gëzimit për festën, u gëzohen edhe një numri të madh të turistëve vendas e të huaj që vërshojnë këtë vend në këtë kohë. 

Bashkia e Korçës për të rritur atraktivitetin në këto ditë festive ka organizuar dy panaire të veçanta, atë të Poçerisë dhe panairin e Pranverës. Siç raporton agjencia shtetërore e lajmeve e Shqipërisë, në disa prej hoteleve në këtë qytet tashmë janë plotësuar rezervimet, përcjell albinfo.ch.

Korça vitet e fundit ka njohur një rritje të madhe të turizmit, falë dhe investimeve të shumta si brenda qytetit, dhe në zonat kryesore turistike. Për aventurierët atraksion sjellin edhe fshatrat Dardhë dhe Voskopojë, ku gjelbërimi, pista e skive gjatë sezonit dimëror, agroturizmi dhe hiking janë kryefjalë e këtyre dy prej zonave më të vizituara.