Në byronë e BE-së për azilin bën pjesë edhe Zvicra

Si shtet anëtar i asociuar i Dublinit, Zvicra mund të marrë pjesë me status vëzhguesi në këshillimet strategjike të menaxhmentit të EASO

Zvicra duhet të bashkëpunojë më ngushtë me Bashkimin Evropian në sferën e azilit. Për të realizuar këtë synim, Këshilli Federal i Zvicrës planifikon të marrë pjesë në punën e Zyrës Mbështetëse për çështje të azilit (EASO) që vepron në kuadër të BE-së.

Zyra e përmendur promovon bashkëpunimin e shteteve të Bashkimit Evropian në fushë të azilit. Veç kësaj ajo mbështet edhe shtetet pjesëtare të “Dublinit” të cilat janë nën presion më të madh sa i përket azilkërkuesve. Fjala është për shtetet si Greqia, Italia, Qiproja dhe Bullgaria, që ndodhen në zonat kufitare të BE-së me shtetet e treta.

Siç dihet, me marrëveshjen e Dublinit, parashihet që kërkimi i azilit të bëhet vetëm në njërin nga shtetet evropiane, gjegjësisht ata që kërkojnë azil edhe në shtetin e dytë, detyrohen të kthehen në të parin.

Duke bashkëpunuar me EASO-n, Zvicra fiton qasje në analizat mbi riskun dhe informacionet lidhur me praktikën e shteteve partnere në sferë të azilit. Ajo do të marrë pjesë në të gjitha aktivitetet e zyrës së përmendur. Ndërkaq, si shtet anëtar i asociuar i Dublinit, Zvicra mund të marrë pjesë me status vëzhguesi në këshillimet strategjike të menaxhmentit të EASO.

Por, Zvicra nuk do të ketë të drejtë vote për veprimet operative të EASO-s. Ajo do të caktojë vetë se cilët ekspertë dhe sa të tillë do të angazhojë për zyrën në fjalë.

Siç thuhet në një komunikatë të Departamentit për çështje të policisë dhe të drejtësisë, kostoja e angazhimit të Zvicrës në këtë zyrë është më e ulët se një milion  franga në vit.