Ndalim testues i duhanit në ambientet e hapura të stacioneve hekurudhore

Fjala është për stacionet si: Basel SBB, Zürich Stadelhofen, Bellinzona, Chur dhe Nyon. Këto stacione për disa muaj do të jenë “zona të zgjeruara pa duhan”

Keystone

Duke filluar nga dita e parë e shkurtit 2018 Ndërmarrja Federale e Hekurudhave SBB/CFF do të bëjë testimin e ndalimit të tymosjes së duhanit në gjashtë stacione të zgjedhura hekurudhore, në pjesë të ndryshme të Zvicrës, shkruan srf.ch. Konsumimi i duhanit është prej kohësh i ndaluar në hapësirat e mbuluara të stacioneve por tash bëhet fjalë për ndalim edhe në ambientet e hapura-

Fjala është për stacionet si: Basel SBB, Zürich Stadelhofen, Bellinzona, Chur dhe Nyon, me çfarë përfshihen në një masë të gjitha regjionet gjuhësore të Zvicrës, transmeton albinfo.ch. Këto stacione për disa muaj do të jenë “zona të zgjeruara pa duhan”, thuhet në një komunikatë të SBB/CFF.

Rezultatet e testimit do të shërbejnë pastaj si bazë për të realizuar një zgjidhje të unifikuar për gjithë Zvicrës sa i përket ndalimit të duhanit ne hapësirat e të gjithë sacioneve hekurudhore.

Por ky hap ashtu si dhe hapa të tjerë që gjithnjë më shumë po synojnë drejt kufizimit të hapësirave për duhanpirje, nuk ka kaluar pa reagime. Rreth një e katërta e zviceranëve mbi moshën 15 vjeçare tymosin duhan në mënyrë të rregullt ose të herëpashershme dhe ata i konsiderojnë këto masa si diskriminim të tyre.

Ndër masat që po shqyrtohen në vende dhe nivele të ndryshme, në këtë drejtim, është edhe ndalimi i pirjes së duhanit nëpër tarraca të restoranteve. Një propozim i tillë është bërë në Parlamentin e Kantonit të Tiçinos dhe ka shkaktuar tashmë reagime të ashpra të duhanxhinjve.

Por ka edhe nga personat që nuk konsumojnë duhan dhe që janë kundër ndalesave drastike të duhanit në hapësira publike, shkruan albinfo.ch. Kështu, kryetarja e Forumit të Konsumatorëve, Babette Sigg, e njohur si person që nuk pi duhan, thotë për shembull se ndalimi i duhanit nën qiellin e hapur janë të tepërta dhe përbëjnë një stigmatizim.

“Ne jetojmë në një shoqëri të lirë dhe unë e konsideroj gabim që tymosja e duhanit po kufizohet gjithnjë më shumë”, ka thënë Sigg.