Mustafa po trajtohet në Gjermani

Kryetari i Lidhjes Demokratike të Kosovës, Isa Mustafa, në orët e para të ditës së sotme u dërgua drejt Gjermanisë për trajtim të mëtejmë mjekësor. Ai do të shtrihet në një spital në Shtutgart.

Presidenti Thaçi dhe Qeveria e Kosovës kanë ofruar gjithë mbështetjen institucionale për t’i ofruar ndihmën e duhur ish-kryeministrit dhe aktualisht kryetarit të LDK-së, përcjell albinfo.ch.

Ish-kryeministri Isa Mustafa, u dërgua me avion special për trajtim mjekësor në Shtutgart të Gjermanisë.

Për hospitalizimin e Mustafës në Kosovë, Spitali Amerikan, deklaroi se gjendja e ish-kryeministrit të vendit, kishte nisur të përmirësohej, por nevoja për terapi dhe rehabilitim të vazhdueshëm ka imponuar rekomandimin për dërgim jashtë vendit, raporton televizioni publik i Kosovës.

Në njoftimin e Spitalit Amerikan, sqarohet se Mustafa në spital është paraqitur për shkak të simptomave të lodhjes, plogështisë gripale dhe dobësisë së gjymtyrëve dhe pas procedurave përkatëse diagnostike, është arritur të diagnostikohet dhe të trajtohet me terapinë përkatëse specifike që jepet për këtë rast.

Siç merr vesh RTK, dërgimi i Mustafës për trajtim jashtë vendit u bë për shkak të dyshimeve të mjekëve se kryetari i LDK-së vuan nga një sëmundje e rrallë, sindroma GBS që është një çrregullim i muskujve, gjendje kjo e cila mund të lërë pasoja në aftësinë e pacientit për të lëvizur. Por, një gjë të tillë e mohon këshilltari i Mustafës, Besnik Berisha i cili insiston se shefi i tij është i sëmurë nga gripi.