Meta dekreton Gjeneral Kollçakun, Shef të Shtabit të Përgjithshëm

Në kuadër të NATO-s, detyra e tij e fundit ka qenë Drejtor i Divizionit të Koordinimit dhe Integrimit në Komandën Supreme të Aleancës në periudhën 2013-2014

Presidenti i Shqipërisë, Ilir Meta, ka dekretuar  Gjeneral Brigade, Bardhyl Kollçakun në postin e Shefit të Shtabit të Përgjithshëm. Ai pason në këtë detyrë Jeronim Bazen, i cili u refuzua nga paraardhësi i Metës, Bujar Nishani për të mbajtur këtë post.

Sipas njoftimit të Presidencës, shefi i ri i Shtabit të Përgjithshëm të Forcave të Armatosura të Shqipërisë, Gjeneral Brigade Kollçaku në karrierën e tij të gjatë ushtarake ka shërbyer si Drejtor i Drejtorisë në Shtabin e Përgjithshëm, para se të kryente detyrën e Drejtorit të Përgjithshëm të Agjencisë së Inteligjencës, Sigurisë dhe Mbrojtjes në vitin 2015.

Në kuadër të NATO-s, detyra e tij e fundit ka qenë Drejtor i Divizionit të Koordinimit dhe Integrimit në Komandën Supreme të Aleancës në periudhën 2013-2014.