Mavraj nuk e braktis Shqipërinë për Kosovën

“Gjenerata pas nesh ka për të vendosur të luajë për Kosovën. Personalisht pas 10 vitesh do të luaja për Kosovën dhe jo Shqipërinë”, theksoi Mavraj

Mbrojtësi i Kombëtares shqiptare, Mërgim Mavraj ka folur rreth Kampionatit Evropian dhe gjasat e Shqipërisë, si dhe të ardhmen e tij pas pranimit të Kosovës në FIFA. Në një intervistë për “Kicker”, Mavraj është shprehur se Shqipëria nuk bën të nënvlerësohet.

“Gabimi më i madh i rivalëve është të na nënvlerësojnë. Kemi besim të madh te vetja dhe forca e skuadrës. Po punojmë intensivisht për të luajtur rol parësor në Evropian. Franca është favorite në grup, ndërsa Zvicra nuk është më aq e fortë sa ishte me trajnerin Hitzfield”, deklaroi Mavraj.

I pyetur për temën e Përfaqësuesen e Kosovës, pas pranimit të kësaj të fundit në UEFA dhe FIFA, Mavraj foli i bindur për zgjedhjen që do të bëjë në vazhdimësi. “Gjenerata pas nesh ka për të vendosur të luajë për Kosovën. Personalisht pas 10 vitesh do të luaja për Kosovën dhe jo Shqipërinë. Në situatën aktuale, nuk e mendoj aspak afrimin te Kosova. Kjo është edhe kundrejt mirënjohjes dhe detyrimit moral që unë kam ndaj FSHF-së. Dëshira ime e madhe është që këto kombëtare të luajnë në një simbol kombëtar, ashtu siç ka qenë gjithë kohës”, ka përfunduar Mavraj.