Mavraj, i lumtur që iu bashkua Hamburgut

Mërgim Mavraj u shpreh i lumtur, pasi iu bashkua Hamburgut, duke thënë se ana njerëzore është shumë e rëndësishme për të

Mbrojtësi i Kombëtares shqiptare, Mërgim Mavraj edhe zyrtarisht është prezantuar si futbollist i Hamburgut, duke kaluar nga Kolni, shkruan albinfo.ch.

Nëpërmjet një postimi në faqen e internetit, klubi gjerman i Bundesligës ka konfirmuar transferimin e Mavrajt nga Kolni në Hamburg.

“Ky mund të jetë një vendim i papritur për shumë njerëz, por situata me kontratën time te Kolni dhe interesi i madh nga Hamburg, më shtynë të marr këtë vendim”, deklaroi Mavraj në faqen zyrtare të Hamburgut.

“U gëzova shumë për interesin e Hamburgut. Për mua ana njerëzore është shumë e rëndësishme dhe unë dua të mbahem mend jo vetëm si një futbollist i mirë, por edhe si një njeri i mirë. Hamburgu është një klub i madh me një tifozeri të shkëlqyer dhe për mua është ëndërr që të luaj këtu”, theksoi ai.

30-vjeçari Mavraj ka firmosur kontratën me Hamburgun deri më 30 qershor 2019. Më parë ai ka luajtur për skuadra si Darmstad, Bochum, Greuther Fyrth dhe Koln.

Me kontratën e re, ai pritet të përfitojë më shumë se një milion euro në vit.

(Foto: Facebook)