Masa të forta sigurie për Forumin e Davosit

Përgjegjësinë për sigurinë në WEF e ka një trupë ndërkantonale e policisë. Asaj do t`i vijnë në ndihmë po ashtu edhe rreth 4500 ushtarë

Sulmet terroriste të para dy javëve në Paris kanë imponuar një ashpërsim të masave të sigurisë në çdo fushë të jetës në Zvicër. Ndërkaq, kur është fjala për një tubim të madh politik dhe ekonomik siç është Forumi Ekonomik i Davosit (WEF) masat e sigurisë duhet të jenë dukshëm më të ashpra. Gjatë punimeve të forumit që fillojnë të mërkurën dhe zgjasin katër ditë, sipas autoriteteve të sigurisë konsiderohet se rreziku më i madh vjen nga individë kriminelë, ithtarë të radikalizmit islam dhe jo nga grupimet e organizuara. Megjithatë, policia e kantonit Graubünden ku mbahet tubimi, nuk ka ende ndonjë indikacion për ndonjë kërcënim konkret. Përgjegjësinë për sigurinë e rreth 2500 pjesëmarrësve në WEF e ka një trupë ndërkantonale e policisë. Asaj do t`i vijnë në ndihmë po ashtu edhe rreth 4500 ushtarë.