Maqedoni: Çmimet e produkteve bazë mund të pësojnë ulje

Keystone EPA/ANDY RAIN

Rritja e çmimeve të produkteve bazë, sikurse në gjithë Evropën, ka prekur edhe Maqedoninë e Veriut. Por, në këtë vend, brenda dy jave prodhuesit vendorë të produkteve ushqimore mund të rishikojnë çmimet. Kjo ngase të njëjtit janë mbështetur nga shteti ku u është subvencionuar rryma.

Nga sektori i furrtarëve në Odën Ekonomike thonë për alsat se keqpërdoruesit le të ndëshkohen nga inspektorati, por përveç rrymës, lënda e parë e importuar dhe mungesa e fuqisë punëtore i mbajnë çmimet e larta, përcjell albinfo.ch.

“Nga njëra anë kemi subvencionim të çmimit të rrymës, por njëkohësisht kemi rritje të çmimeve të resurseve njerëzore. Ajo përqindje e volitshme absorbohet nga ajo që kompanitë paguajnë më tepër për të punësuarit. Kjo është mirë kur pagat rriten, pasi që ulin emigrimin e të rinjve që shkojnë në Perëndim. Ai balancim i uljes së çmimit të rrymës është shpenzuar në rritjen e pagave”, tha Goran Georgievski, Oda ekonomike, sektori i furrtarëve.

Por, qytetarët vazhdojnë të ankohen çdo ditë se në vend të uljes së çmimeve, shumica e produkteve shiten në tregje me çmime të reja, madje më të larta se para zbatimit të rrymës së subvencionuar.

Me çmime të larta vazhdojnë të mbeten fruta perimet që prodhohen këtu dhe produktet higjienike.

Maqedonia e Veriut prodhon rreth 250 mijë tonë drithë në vit, ndërsa nevojat e popullsisë janë 330 mijë tonë, që nënkupton se 80 mijë tonë grurë/miell importohet, kryesisht nga Serbia.