Majlinda fiton dhe siguron gjysmëfinalen

Majlinda Kelmendi e ka kaluar pengesën për në gjysmëfinale në Lojërat Olimpike në Rio.

Xhudistja kosovare Majlinda Kelmendi në çerekfinale Majlinda u ballafaqua pikërisht me garuesen nga Mauritiusi, Christianne Legentil, e cila e kishte mposhtur katër vite më parë në Olimpiadën e Londrës.

Majlinda sërish hasi në probleme të mëdha në përballje me garuesen nga Mauritiusi, duke e mposhtur vetëm në saje të më shumë kartonëve.

Kësisoj, Majlinda iu hakmor xhudistes nga Mauritiusi për humbjen e shkaktuar katër vjet më parë në Londër dhe tashmë i duhen edhe dy fitore për ta realizuar ëndrrën e saj dhe të një kombi të tërë për ta fituar medaljen e artë olimpike.

Në sfidën e parë xhudistja jonë e mposhti zviceranen, Evelyne Tschopp, pas vetëm 25 sekondash.

Lufta e parë ka qenë shumë e rëndësishme për t’u kaluar me një lehtësi të tillë, pasi presioni ishte i madh, duke pasur parasysh se në Olimpiadën e Londrës pësoi humbje qysh në meçin e parë.

Në gjysmëfinale Majlinda do të takohet me xhudisten japoneze Misato Nakamura. Nakamura është xhudiste me cilësi të mëdha dhe padyshim se Majlindën e pret një luftë tepër e vështirë. Nakamura në çerekfinale fitoi pas një lufte maratonike kundër ruses, Natalia Kuziutina.