Macron bën thirrje për ndalimin e eksportit të armëve në Izrael

EPA/SEBASTIEN NOGIER

Presidenti francez Emmanuel Macron ka bërë thirrje sot për ndalimin e dërgesave të armëve në Izrael në një intervistë radiofonike.

“Është prioritet kthimi te një zgjidhje politike dhe ndalimi i dërgesave të armëve për luftimet në Rripin e Gazës”, tha Macron në radiostacionin France Inter.

“Franca nuk do të furnizojë asnjë armë”, tha ai.

Macron shprehu keqardhjen që pavarësisht të gjitha përpjekjeve diplomatike për një armëpushim, kryesisht me Izraelin, asgjë nuk po përparon në konflikt.

“Mendoj se nuk po dëgjohemi dhe e konsideroj gabim edhe për sigurinë e Izraelit. Kjo është e dukshme në opinionin publik në Francë dhe në një mënyrë edhe më të tmerrshme në opinionin publik të rajonit”, theksoi Macron.

“Kjo nxit ndjenjat e pakënaqësisë dhe urrejtjes”, theksoi ai.

“Franca do të vazhdojë të furnizojë Izraelin me pajisje mbrojtëse, kryesisht për mbrojtjen nga raketat”, njoftoi stacioni televiziv francez BFMTV pas intervistës, duke cituar pallatin presidencial.

Më 7 tetor 2023, terroristët nga organizata militante palestineze Hamas dhe grupet aleate kryen masakra brutale ne Izrael – të cilat rezultuan në mbi 1200 njerëz të vrarë dhe rreth 250 të tjerë të rrëmbyer.

Që nga sulmi i madh i Hamasit, Izraeli ka kryer operacione të rëndësishme ushtarake në Rripin e Gazës.

Sipas shifrave të fundit nga autoriteti shëndetësor i drejtuar nga Hamasi, të cilat nuk mund të verifikohen në mënyrë të pavarur, më shumë se 41 800 njerëz janë vrarë