Ligji për njohjen e stazhit të arsimtarëve për vitet 90-ta, duhet të kalojë procedurat

"Ky Ligj është trajtuar me prioritetin më të lartë brenda Ministrisë së Financave me qëllim e vetëm që ti jepet mbështetje realizimit të të drejtave që dalin nga ky projektligj"

Ligji për Statusin e Punëtorëve të arsimit të viteve të 90-ta, duhet të respektojë procedurat ligjore të adresimit ashtu siç e përcaktohet në nenin 18 të Ligjit të Buxhetit për vitin 2018. Kështu thuhet në një komunikatë për media të Ministrisë së Financave.

“Ministria e Financave sqaron të gjithë punëtoret e arsimit dhe opinionin publik se ky Ligj është trajtuar me prioritetin më të lartë brenda Ministrisë së Financave me qëllim e vetëm që ti jepet mbështetje realizimit të të drejtave që dalin nga ky projektligj”, thuhet në komunikatën e Ministrisë që u bë si reagimi i paralajmërimit të grevës nga SBASHK-u.

Tutje në komunikatë thuhet se Ministria e Financave nuk mund të japë aprovim për një Projektligj, i cili nuk i respekton procedurat e Ligjit të Buxhetit e Ligjit për menaxhimin e Financave Publike. Ky Ligj është bërë shkaktari kryesorë i grevave në sektorin e arsimit.