Lë Zvicrën për Kosovën

Dardan Miftari bëri të ditur se pasi i vdiq babai ka dashur të jetë më afër familjes dhe për këtë arsye u transferua në skuadrën e Ferizajt. "Me vdekjen e tij unë mbeta i vetëm në familjen time të cilës i nevojitesha më shumë se kurrë, pra nënës time, bashkëshortes dhe tre vajzave të mia"

Portieri shkupjan, Dardan Miftari ka vendosur të braktisë Zvicrën dhe të transferohet në skuadrën e Ferizajt. Ai u largua nga skuadra zvicerane Dardania Lausanne për t’u transferuar te skuadra kosovare, bën të ditur gazeta “Koha” e Maqedonisë, përcjell albinfo.ch.

Por, ai braktisi Zvicrës për shkak të vdekjes së babait të tij. “Ta braktis Zvicrën më shtyri vdekja e babait tim, regjisorit Afet Miftari. Me vdekjen e tij unë mbeta i vetëm në familjen time të cilës i nevojitesha më shumë se kurrë, pra nënës time, bashkëshortes dhe tre vajzave të mia. Doja që të jem pranë tyre dhe njëkohësisht të vazhdoj edhe karrierën profesionale. Falënderoj Zotin që ende jam në formë të mirë sportive dhe shpresoj se aventura ime e re te Ferizaj, do të jetë një pikënisje e frytshme”, ka thënë Miftari.

Ai ka shtuar se vendosi t’i bashkohet Ferizajt dhe jo ndonjë skuadre në Maqedoni për shkak të profesionalizimit, derisa e konsideron veten në shtëpi, aty ku ka shqiptarë.

Ai ka shtuar se nuk e ka ndërmend të dorëzohet përkundër moshës 33-vjeçare dhe do të japë maksimumin për skuadrën e Ferizajt.