LDK-ja e VV-ja kërkojnë sërish seancë të jashtëzakonshme

Dy partitë opozitare, LDK-ja e Vetëvendosje, kanë kërkuar seancë të jashtëzakonshme për 16 nëntor për të diskutuar për politikën e jashtme dhe dështimet që opozita i vlerëson se janë të shumta në këtë proces.

Në arsyetimin e kësaj kërkese thuhet se prioritetet e politikës së jashtme në vend se të jenë afatgjatë, po ndryshohen në baza ditore, duke krijuar kështu konfuzion dhe situata të papëlqyera para partnerëve tanë ndërkombëtarë, ku stopimi i procesit të njohjeve është vetëm një nga pasojat e kësaj politike të jashtme të çakorduar, të papërgatitur dhe të dëmshme për shtetin e Kosovës, përcjell albinfo.ch.

“Po ashtu, duke qenë se ministri i Punëve të Jashtme nuk përgjigjet as në interesimet e deputetëve për çështje të politikës së jashtme, pasi ai shumë rrallë merr pjesë në seancat e Kuvendit, si dhe në pamundësi që deputetët dhe Komisioni Parlamentar që mbulon politikën e jashtme të kryejnë detyrën e tyre si mbikëqyrës të ekzekutivit të vendit që merret me politikën e jashtme, kërkohet mbajtja e seancës së jashtëzakonshme”, thuhet në kërkesën e LDK-së dhe VV-së.