Lajçak: Shoqëritë në Kosovë e Serbi të kuptojnë se pa normalizimin nuk ka të ardhme evropiane

Miroslav Lajčák

Emisari i Bashkimit Evropian për dialogun Kosovë-Serbi, Miroslav Lajçak, është shprehur se blloku ka lehtësuar një proces që duhet të çojë në normalizim.

Problematike sipas tij është se mungon presioni për normalizim në shoqëritë e Kosovës dhe Serbisë.

“Është e qartë se elementi më i rëndësishëm për të përfunduar këtë proces është të ndihmojmë shoqëritë të kuptojnë se pa normalizimin e marrëdhënieve, nuk ka të ardhme evropiane për to”, ka thënë Lajçak, në një intervistë për N1 të Sarajevës.

Ai shtoi se mandati i tij ishte i ndarë në dy pjesë – njëra ishte pozitive kur punonte për normalizim, ndërsa tjetra trajtonte krizat në terren dhe përpiqej të parandalonte përshkallëzimin.

Lajçak ka theksuar se pyetja më e madhe tani është se si të zbutet ndikimi i vendimit të Bankës Qendrore të Kosovës për ndalimin e dinarit te komuniteti serb.

“Fatkeqësisht, ky është realitet që është produkt i një niveli shumë të ulët të besimit mes dy shoqërive, ndërmjet Kosovës dhe Serbisë në përgjithësi”, ka shtuar Lajçak./koha.net