Kurti në Kullën e Jasharajve

"Ato tri ditë ishin më shumë se 20 vjet, e këto 20 vjet nuk duken as tri ditë. Lavdi Jasharajve dhe dëshmorëve”, u shpreh Kurti

Me rastin e “Epopesë së UÇK-së”, kryetari i Lëvizjes “Vetëvendosje”, Albin Kurti së bashku me dy deputetët Rexhep Selimi dhe Glauk Konjufca kanë bërë homazhe tek varrezat e Jasharajve në Prekaz.

Kurti tha se para dy dekadave tre breza të kësaj familje u flijuan për popullin.

Sipas tij, Hamza dhe Ademi bashkë me Zarifen, Hidajeten, Selveten, luftuan dhe u sakrifikuan sepse e deshën lirin dhe tokën më shumë se jetën, përcjell albinfo.ch.

“Epopeja ndodhi midis dy demonstratave të fuqishme në Prishtinë. E mbaj mend se si aq masive ishte demonstrata e 9 marsit dy ditë pas epopesë së UÇK-së saqë edhe policia e Serbisë frikësohej të ndërhynte”, tregoi Kurti.

“Jasharajt e ndryshuan popullin sepse e bashkuan atë. Jemi këtu në Prekazin historik. Ato tri ditë ishin më shumë se 20 vjet, e këto 20 vjet nuk duken as tri ditë. Lavdi Jasharajve dhe dëshmorëve”, u shpreh ai.