Kurti: Institucionet e Kosovës shërbejnë për të gjithë qytetarët, pa dallim

Kryeministri thekson se pushteti në komunat veriore kalon vetëm përmes zgjedhjeve të Republikës së Kosovës dhe se qeveria punon për barazi dhe sundim të ligjit.

Kryeministri i Kosovo, Albin Kurti, gjatë përurimit të objektit të Administratës Tatimore në Mitrovicë e Veriut, ka theksuar se institucionet e vendit funksionojnë në shërbim të të gjithë qytetarëve, pa dallim, përcjell albinfo.ch.

I pyetur nëse ka vizituar kryetarin e komunës, Milan Radojeviq, Kurti tha se ende nuk e ka bërë, por se do të kenë mundësinë të takohen. Ai shtoi se në komunat veriore të Ibrit mund të zgjidhet kryetar komune, asamblist apo drejtor, vetëm nëpërmjet zgjedhjeve të Republikës së Kosovës.

“Ka qenë një transferim paqësor i pushtetit. Kjo do të thotë se mund të bëhesh kryetar komune, asamblist ose drejtor, por vetëm përmes zgjedhjeve në Republikën e Kosovës,” tha ai.

I pyetur nga gazetarët serbë nëse ka demokraci në Kosovë, Kurti theksoi se qeveria e tij po punon për barazi dhe sundim të ligjit:

“Ne punojmë për të gjithë qytetarët. Nuk jam mbi ligjin. Koha para qeverisë sonë nuk ka qenë normale. Nuk them se tani është gjithçka normale, por gjithçka po normalizohet. Ligji nuk ndan shoqërinë në të mbrojturit dhe të pambrojturit, por e bashkon me barazi. Nuk mund të jepni shembull ku organet e pushtetit, policia apo administrata tatimore, nuk i shërbejnë të gjithëve në mënyrë të barabartë dhe profesionale,” tha Kryeministri.

---