Kosova e kënaqur me fitoren historike

Përfaqësuesja kosovare mundi Ishujt Faroe në miqësoren e parë pas pranimit në UEFA dhe FIFA

KEYSTONE

Kosova arriti fitore historike, derisa përzgjedhësi dhe lojtarët ishin shumë të kënaqur me këtë fitore ndaj Ishujve Faroe me rezultat 2:0, shkruan albinfo.ch.

Përzgjedhësi i Kosovës, Albert Bunjaki ishte i kënaqur me fitoren. “Ishte një fitore shumë e rëndësishme, sepse tani marrim pikë në miqësore, të cilat na shërbejnë që në shortet e kualifikimeve tjera ta kemi më të lehtë. Patëm shumë probleme me lëndime, por më gëzon fakti që fituam në fund. Tifozët na dhanë energjinë e fundit. Unë i falënderoj shumë për përkrahjen e madhe që na kanë dhënë këtu”, deklaroi Bunjaki pas ndeshjes.

I lumtur ishte edhe Bernard Berisha. “Me të vërtet jam shumë i lumtur. Treguam vlerat tona reale. I kemi kënaqur të pranishmit. Kemi nevojë për mbështetje, herën tjetër do të jemi edhe më mirë. Kur u larguan dy mbrojtësit tanë thashë kemi me pas vështirësi, por Kosova ka të ardhme, ka talente. Ju kemi treguar të gjithëve se Kosova ka djelmosha që luajnë shumë mire”, theksoi Berisha.

Autori i golit të dytë, Elbasan Rashani u shpreh se e kanë ditur që do të jetë vështirë, por nuk janë dorëzuar. “E kemi ditë që do të jetë një lojë e vështirë sepse kanë dëshirë të luajnë dhe kanë lojtarë teknik. Ne besuam në lojën tonë dhe luajtëm shumë mirë”, ka thënë Rashani pas përfundimit të takimit.