KOK bën thirrje për përmirësim të mjedisit

Kryetari i KOK tha se përmes aktiviteteve sportive duan të bëjnë ndryshime edhe në mjedisin në të cilin fëmijët praktikojnë sportin dhe bëjnë gara të ndryshme

Komiteti Olimpik i Kosovës, në bashkëpunim me Komunën e Prishtinës kanë shënuar Ditën Ndërkombëtare të Sportit e Mjedisit.

Fëmijë të shkollave fillore kanë shënuar këtë ditë përmes këngëve, valleve dhe vizatimeve në amfiteatrin në sheshin “Zahir Pajaziti” në Prishtinë. Atyre kryetari i Komiteti Olimpik të Kosovës, Besim Hasani, u tha se KOK-u e ka vendosur mjedisin si njërën ndër tri shtyllat kryesore, krahas sportit dhe kulturës.

Hasani shtoi se përmes aktiviteteve sportive duan të bëjnë ndryshime edhe në mjedisin në të cilin fëmijët praktikojnë sportin dhe bëjnë gara të ndryshme. Ai ka bërë thirrje që të shtohen përpjekjet për të përmirësuar mjedisin.