Katërfish më shumë refugjatë shqiptarë se sirianë!

Nga Shqipëria janë 41 azilkërkues, nga Kosova 36, nga Maqedonia 23 dhe nga Serbia, 44, shkruan lèssentieldeutsch.lu. Ndërsa nga vendet me luftë, si Siria dhe Iraku, azil gjatë tetorit kanë kërkuar vetëm 16 respektivisht 3 persona

Gjatë muajit tetor në Luksemburg kanë kërkuar azil 269 refugjatë. Ajo që bie në sy se rreth gjysma e këtyre vijnë nga shtetet “e sigurta” gjegjësisht vendet ballkanike në të cilat nuk ka konflikte të ndezura. Duke parë shifrat që i kanë publikuar autoritetet e këtij vendi të vogël, mund të vihet në përfundim se bëhet fjalë kryesisht për shqiptarë. Kështu, nga Shqipëria janë 41 azilkërkues, nga Kosova 36, nga Maqedonia 23 dhe nga Serbia, 44, shkruan lèssentieldeutsch.lu. Ndërsa nga vendet me luftë, si Siria dhe Iraku, azil gjatë tetorit kanë kërkuar vetëm 16 respektivisht 3 persona.

Nga ana tjetër në muajin tetor Luksemburgu ka pranuar 25 refugjatë nga Siria, duke e përmbushur kështu marrëveshjen në mes të BE-së dhe Turqisë për zbutjen e krizës së refugjatëve të strehuar në Turqi, transmeton albinfo.ch. Por ky numër nuk llogaritet në atë të azilkërkuesve pasi që ata e fitojnë në mënyrë automatike statusin e refugjatit të pranuar.

Llogaritur për gjithë vitin, sirianët përbëjnë numrin më të madh të azilkërkuesve në Luksemburg. Nga 1690 kërkesat për azil që janë bërë nga fillim i i vitit deri më tash, 14.1% vijnë nga Siria. Në vendin e dytë janë ata nga Kosova, 11.4% ose 192 persona dhe menjëherë pas tyre vijnë shtetasit e Shqipërisë, me 11.1% ose 188 veta.

Janë interesante të dhënat për njohjen e statusit të azilit në këtë vend. Gjatë dhjetë muajve të deritashëm të vitit, ky status u është njohur 611 vetave që është më shumë se trefishi i vitit të kaluar, kur ishin vetëm 200, përcjell albinfo.ch.

Po ashtu gjatë këtyre dhjetë muajve Luksemburgun e kanë braktisur më shumë se 400 të huaj, 348 nga të cilët vullnetarisht.