Kantoni Uri “zbut” detyrimin e gjuhës frënge në shkolla

Në bazë të këtij propozimi, në të ardhmen pothuajse çdo i katërti nxënës do të mund të lirohet nga orët e frengjishtes

Kantoni Uri i Zvicrës qendrore ka vendosur që të bëjë zbutjen e radhës të detyrimit të nxënësve të shkollave për mësimin e gjuhës frënge. Kështu, me të renë nxënësit e shkollës sekondare do ta kenë më të lehtë të lirohen nga detrimi i ndjekjes së orëve të frengjishtes në rastet kur u rrezikohet suksesi në lëndët si gjuha gjermane ose matematika.

Qeveria e Kantonit Uri, kundër vullnetit të saj ka dërguar për miratim në parlament një propozim përkatës të bërë nga parlamentarët. Në bazë të këtij propozimi, në të ardhmen pothuajse çdo i katërti nxënës do të mund të lirohet nga orët e frengjishtes, shkruan srf.ch. Aktualisht, nga detyrimi i mësimit të frengjishtes lirohen vetëm nxënësit që janë të dobët në mësimin e gjuhëve.

Tendenca e treguar në disa kantone gjermanishtfolëse për braktisjen e gjuhës frënge në shkollat e tyre ka shkaktuar pakënaqësi në radhë të parë te kantonet frankofone. Reagime kundër kësaj tendence ka pasur edhe nga institucionet dhe asociacionet arsimore në zonën gjermane të Zvicrës.