Kamenicë: Kontingjent ndihmash nga Austria

Shoqata nga Gunskirchern i Austrisë ka sjellë në Kamenicë një kamion donacion të mbushur me pajisje dhe veshmbathje.

Ndër pajisjet e ardhura ishin 14 shtretër për QKMF-në dhe personat me aftësi të kufizuar, 35 karroca për personat me aftësi të kufizuar, inventar shkollor për shkollën në Strezoc, rroba dhe veshmbathje për familjet në gjendje të rëndë sociale, biçikleta dhe gjëra të tjera të nevojshme, raportojnë mediat lokale përcjell albinfo.ch.

Ky donacion u realizua në kuadër të bashkëpunimit të nënkryetarit të Komunës, Fatmir Matoshi, me Drejtorinë e Shëndetësisë, HandiKOS-in dhe grupin e bashkatdhetarëve kamenicas që jetojnë në Austri.

“Kjo është një ndihmë dhe mbështetje e veçantë për komunën tonë dhe shumë familje, të cilat kanë anëtarë me aftësi të kufizuara, dhe po ashtu për familjet që jetojnë në kushte të rënda sociale. Përfitues do të jenë edhe HandiKOS, QKMF-ja dhe shkolla në Strezoc. Për këtë donacion e falënderojmë shumë zotëri Herman Hochreiter, me kolegët e tij, ndërsa merita të veçanta kanë bashkatdhetarët tanë në Austri, e do t`i veçoja zotrinjtë Rexhep Isufi e Naser

Shkodra dhe të gjithë përkrahësit e këtij projekti. Falënderojmë zyrën e HandiKOS-it, drejtorin Agim Bucolli për kontributin, si dhe drejtorin e Shkollës së Mesme Profesionale, Qamil Qehaja, me nxënësit e profesorin Nebi që ndihmuan në shkarkimin e këtyre mallrave”, tha nënkryetari i Kamenicës, Fatmir Matoshi.

Herman Hochreiter nga Rumanienhilfe Gunskirchen, tha se ky është transporti i 277-të që e bëjmë në shumë shtete të botës, ndërsa jemi të kënaqur që këtë arritëm ta bëjmë edhe në Kamenicë.

„Fqinjtë tanë në Austri janë nga kjo komunë, dhe ne në bashkëpunim me ta dhe me nënkryetarin e komunës tuaj arritëm me sukses të sjellim këtë donacion. Shpresojmë të kemi arritur që sadopak t’u ndihmojmë familjeve këtu”, tha Herman Hochreiter.