Hoxha hero, Partizani tutje

Portieri Alban Hoxha realizoi një penallti në stilin panenka, derisa priti edhe tre penallti, për të kualifkuar Partizanin tutje

Alban Hoxha bën mrekullinë në “Grupama Arena” të Budapestit duke çuar skuadrën e tij, Partizanin, në raundin tjetër të Kigës së Kampionëve, duke eliminuar vendasit e Ferencvaroshit, shkruan albinfo.ch

Kanë qenë gjuajtjet e 11-metërshave që kanë vendosur gjithçka pas 90 minutëshi dhe shtesa mbaroi me rezultatin e barabartë 1:1 ashtu si në “Elbasan Arena”.

Që në minutën e 14-të Zoltan Gera, me një penallti, kalon Ferencvaroshin në avantazh, ndërkohë që të “kuqtë” e drejtuar nga italiani Sormani bëjnë një paraqitje dinjitoze duke mos e ulur ritmin për asnjë moment.

Në mbyllje të pjesë së parë, presioni i Partizanit shtyn drejt autogolit mbrojtësin e Hysing. Pjesa e dytë ka qenë e barabartë me të dyja skuadrat që janë treguar të kujdesshme deri sa çuan lojën në shtesa e më pas tek penalltitë.

Kapiteni Hoxha e fillon mrekullinë me goditjen e parë. Më pas i jep sigurinë skuadrës me pritjen e tre 11-metërshave, gjë që zhvlerësoi edhe gabimin e Vilës që ishte i vetmi, i cili humbi për të kuqtë. Më pas Trashi dhe Ekuban realizojnë penalltitë e tyre. E në fund Hoxha me pritjen e 11-metërshit të Ramirez kualifikon Partizanin për në raundin tjetër të Ligës së Kampionëve, ku i pret kampionia e Austrisë, Red Bull Salzburg, ndeshjet do të zhvillohen më 27 korrik dhe takimi i kthimit më 2 gusht.