Hitzfeld: “Xhaka është njeriu i duhur për Bayernin”

Ish selektori i kombëtares zvicerane, trajneri gjerman Othmar Hitzfeld është shprehur ne favor të kalimit të Granit Xhakës në Bayern. Madje, sipas tij, futbollisti me rrënjë shqiptare nga Kosova përshtatet më së miri me frymën që e kultivon klubi i madh bavarez.

«Jam i bindur se ai ka një karrierë madhështore para vetes. Ai është një lider, një lojtar i cili merr përgjegjësi dhe paraqitet me vetëbesim. Bayern ka nevojë për lojtarë që e kanë të theksuar vetëbesimin. Për këtë arsye Xhaka zotëron me siguri cilësinë e duhur për të pasur sukses në Bayern», thotë Hitzfeld.

Më tutje ai shton se edhe rrethanat në FC Bayern janë aktualisht të tilla që e favorizojnë inkuadrimin e Granit Xhakës. «Është e qarte: Në Bayern brenda dy ose tri vitesh do të ndodhë ndryshimi. Xabi Alonso me siguri nuk do të bëhet më i ri. Dhe është e logjikshe që ai pas një apo dy vitesh nuk do të mund të luajë më. Bayern ka nevojë për pozicionin që luan ao. Vidal nuk është një organizator loje (playmaker) ndërsa Schweinsteiger ndërkohë ka kaluar në ManUtd».