Hahn thotë se marrëveshja s’duhet ta rrezikojë stabilitetin

Komisioneri për zgjerim Hahn ka deklaruar në lidhje me dialogun dhe bisedimet mes Kosovës dhe Serbisë.

Komisionari për Zgjerim, Johanes Hahn, vlerëson se marrëveshja përfundimtare mes Kosovës dhe Serbisë nuk duhet ta rrezikojë stabilitetin e përgjithshëm të rajonit.

Ai këto komente i bëri pas takimit joformal me kryeministrat e Ballkanit Perëndimor, i mbajtur në Durrës.

“Nuk është e përshtatshme që në këtë fazë të bëjmë komente lidhur me këtë çështje. Takimi i radhës në Bruksel nuk do të jetë i fundit, do të kërkojë kohë që të gjendet një marrëveshje, nuk jam i gatshëm të bëj një koment por ne nuk do të pranojmë asnjë anëtar të ri nëse nuk janë zgjidhur problemet dypalëshe. Çdo lloj marrëveshje dypalëshe nuk duhet të rrezikojë stabilitetin e përgjithshëm të rajonit. Ky duhet të jetë objektivi kyç”, tha Hahn.