Granit Xhaka: Nuk e doja Shqipërinë në grupe

"Ju nuk e dini se si është kur luan kundër një kombi, të cilit i detyrohesh shumë"

Granit Xhaka duke folur për ‘Bild’ ka thënë se nuk dëshironte që në grupet e Evropianit të ballafaqohej me Shqipërinë dhe vëllanë e tij, Taulantin, i cili luan për kuqezinjtë. “Nuk do doja të luaja kundër Shqipërisë. Vëllai kundër vëllait, nuk e di si do të jetë kjo ndjenjë që do të përjetoj në Francë kësaj vere. Ju nuk e dini se si është kur luan kundër një kombi, të cilit i detyrohesh shumë, transmeton albinfo.ch.

Unë e di mirë, se e kam provuar, por nuk dëshiroja ta përsërisja më kurrë. Është sinqerisht një ndjenjë e ndyrë”, ka thënë Xhaka, duke shtuar: “Është shumë emocionuese. Shumë njerëz nuk e kuptojnë ende pse kam vendosur të luaj për Zvicrën. Ka njerëz të lënduar, ndaj jam fishkëllyer nga bashkatdhetarët e mi, madje pjesërisht edhe jam ofenduar në dy ndeshjet e luajtura kundër Shqipërisë”, theksoi Xhaka.