Gjermania teston avionin e ri luftarak, Luftwaffe forcon fuqinë ajrore për dekadat e ardhshme

Eurofighter Typhoon “Tranche 4” kreu fluturimin e parë testues dhe do të pajiset me radarë të avancuar e raketa me rreze të gjatë veprimi.

Gjermania ka shënuar një moment të rëndësishëm për mbrojtjen e saj ajrore, pasi avioni i parë luftarak Eurofighter Typhoon “Tranche 4” kreu me sukses fluturimin e parë testues nga një pistë në Bavari, transmeton albinfo.ch.

Avioni është pjesë e projektit Quadriga, përmes të cilit Forca Ajrore Gjermane (Luftwaffe) po modernizon flotën e saj me gjeneratën më të avancuar të Eurofighterëve. Airbus Defence and Space konfirmoi se testimi u zhvillua me sukses dhe se dorëzimet e para për Luftwaffen do të nisin më vonë gjatë këtij viti.

Eurofighter Typhoon, i zhvilluar nga Gjermania, Mbretëria e Bashkuar, Italia dhe Spanja, është prej vitesh shtylla kryesore e mbrojtjes ajrore në disa vende evropiane. Versioni i ri “Tranche 4” sjell përmirësime të rëndësishme teknologjike, duke përfshirë radarin modern AESA (Active Electronically Scanned Array), i cili mund të gjurmojë njëkohësisht disa objektiva dhe ofron mbrojtje më të mirë ndaj ndërhyrjeve elektronike.

Aktualisht, Gjermania disponon rreth 138 avionë Eurofighter, ndërsa modeli i ri do të zëvendësojë avionët më të vjetër të serisë “Tranche 1”, që janë në shërbim që nga fillimi i viteve 2000.

Në vitin 2020, Berlini porositi 38 avionë Tranche 4, ndërsa në fund të vitit të kaluar nënshkroi edhe një kontratë për 20 avionë të tjerë Tranche 5, duke e çuar numrin e përgjithshëm të porosive të reja në 58 avionë.

Modernizimi i flotës vjen në një kohë kur programi evropian për zhvillimin e avionit luftarak të gjeneratës së ardhshme (FCAS) po përballet me vonesa dhe mosmarrëveshje politike e financiare. Për këtë arsye, investimi në Eurofighterët e rinj shihet si një garanci për ruajtjen e aftësive ushtarake të Gjermanisë në dekadat e ardhshme.

Sipas autoriteteve gjermane, avionët e rinj do të pajisen edhe me raketat Taurus KEPD 350, të afta për të goditur objektiva në distanca të gjata, duke rritur ndjeshëm kapacitetet sulmuese të Luftwaffes./Albinfo.ch

---