Gjermania raporton prova të krimeve të luftës në Ukrainë

pixabay

Bëhet e ditur se Gjermania ka mbledhur prova të krimeve të luftës në Ukrainë, tha prokurori i përgjithshëm gjerman në një intervistë të botuar sot, duke shtuar se ai beson se ka nevojë për fillimin e një procesi gjyqësor në nivel ndërkombëtar, përcjell albinfo.ch.

“Tani, për shembull, ne po fokusohemi në vrasjet masive në Bucha ose sulmet në infrastrukturën politike të Ukrainës”, tha Peter Frank për gazetën Welt am Sonntag. Deri më tani, prokurorët kanë mijëra prova, shtoi ai, pa dhënë detaje.

Gjermania filloi mbledhjen e provave në mars 2022 për të ndjekur penalisht krimet e mundshme të luftës, duke përfshirë intervistimin e refugjatëve ukrainas dhe vlerësimin e informacionit të disponueshëm publikisht, tha Frank, duke shtuar se prokurorët gjermanë ende nuk kanë filluar hetimin e individëve të veçantë.

I pyetur se kush duhet të gjykohet, Frank tha se udhëheqësit e shtetit rus dhe ata që zbatojnë vendimet në nivelin më të lartë ushtarak duhet të mbajnë përgjegjësi. Ukraina po bën presion për krijimin e një gjykate speciale për të ndjekur penalisht liderët ushtarakë dhe politikë rusë që i konsideron përgjegjës për krimet e luftës.

Gjykata Ndërkombëtare Penale filloi hetimin e saj për krimet e supozuara kundër njerëzimit dhe krimet e luftës disa ditë pasi Moska filloi pushtimin e saj më 24 shkurt, por nuk ka juridiksion për të ndjekur penalisht këto krime.

Kryetarja e Komisionit Europian, Ursula von der Leyen, e cila ndodhet për një vizitë në Kiev, tha të enjten se në Hagë do të krijohet një qendër ndërkombëtare për të ndjekur penalisht krimin e luftës në Ukrainë.

Moska ka hedhur poshtë akuzat e Kievit dhe vendeve perëndimore për krime lufte. Kremlini ka thënë se ka nisur një “operacion special ushtarak” për të mbrojtur sigurinë e Rusisë.