Gashi beson se mund të befasojnë në Evropian

“Shkojmë në Francë me besim të madh, sepse luajtëm mirë në fushatën kualifikuese dhe mposhtëm ndër të tjerë edhe Portugalinë”, deklaroi Gashi

Sulmuesi shqiptar, Shkëlzen Gashi në një intervistë për faqen zyrtare të FIFA-s, ka thënë se mund të befasojnë në Kampionatin Evropian, shkruan albinfo.ch.

Ai beson se Shqipëria mund të kalojë grupin, derisa ndeshja ndaj Zvicrës është speciale. “Kur mësova se do të luajmë sërish kundër Zvicrës vetëm munda të qesh pasi ne po presim me padurim këtë turne. Jemi vërtet në një grup shumë të fortë, por ne mund të bëjmë befasinë. Shkojmë në Francë me besim të madh, sepse luajtëm mirë në fushatën kualifikuese dhe mposhtëm ndër të tjerë edhe Portugalinë. E dimë se çfarë mund të bëjmë dhe nuk i frikësohemi askujt. Kemi luajtur dy miqësore me Francën dhe nuk kemi humbur. Ne do të japim maksimumin tonë dhe më pas do të shohim se ku do të na çojnë përpjekjet tona pas 90 minutash”, u shpreh Gashi për portalin e FIFA-s.

Ai ka përshkruar momentin kur Shqipëria siguroi kualifikimin. “Kur siguruam kualifikimin ishte diçka mahnitëse dhe e papërshkrueshme. Duam që të kemi një Evropian të madh. Kur mendoj sesa shumë futbollistë grumbulloi trajneri ynë gjatë eliminatoreve, mendoj se bëri një punë të admirueshme. Ne jemi gjeneratë e re që jemi rritur ose luajmë jashtë. Jemi të uritur dhe ky është sekreti i suksesit”, theksoi sulmuesi i Colorados.